Homilador ayol haj qilishi joizmi?

Javob

Alloh taologa hamdu sanolar, Rasululloh sollallohu alayhi vasallamga salavot va salomlar bo‘lsin.

Alloh taologa hamd-u sanolar, Rasululloh sollallohu alayhi vasallamga salavot va salomlar bo‘lsin.

1. Homilador ayolning hajga borishida hech qanday monelik yo‘q. Homilador ayol pokdir, unga namoz va ro‘za vojib bo‘ladi, uning talog‘i sunnat talog‘idir.
2. Balki, sunnatda sobit bo‘lganki, Asmo bint Umays roziyallohu anho Nabiy sollallohu alayhi vasallam bilan homilador, tug‘ishi yaqin holda hajga chiqqan, hatto miyqotda farzand ko‘rgan.

Oisha roziyallohu anhodan rivoyat qilinadi: «Asmo bint Umays Shajarada (Zul Hulayfadagi joy) Muhammad ibn Abu Bakrni tug‘di. Rasululloh sollallohu alayhi vasallam Abu Bakrga unga g‘usl qilib, ehrom bog‘lashini aytishni buyurdilar» (Sahihi Muslim, 1209).

Imom Navaviy hadisning foydalari haqida aytadi: «Ushbu hadisdan nifosli va hayzli ayolning ehromi sahih ekani, ularning ehrom uchun g‘usl qilishlari mustahabligi hukmi olinadi. Bunga buyurishga ijmo’ qilingan, lekin bizning mazhabimiz, Molik, Abu Hanifa va jumhur mazhabida bu mustahabdir. Hasan va zohiriylar esa, bu vojib, deganlar.

Hayzli va nifosli ayolning hajda tavof va uning ikki rakaat namozidan tashqari barcha amallari sahih bo‘ladi. Chunki Nabiy sollallohu alayhi vasallamdan sahih hadisda keladi:

Oisha roziyallohu anhodan rivoyat qilinadi:… «Rasululloh sollallohu alayhi vasallam: «Hojining qiladiganini qilaver, faqat pok bo‘lguningcha Baytni tavof qilma», dedilar» (Sahihi Buxoriy, 1650; Sahihi Muslim, 1211). («Sharhi Sahihi Muslim lin-Navaviy», 8/133).

Ayniqsa, agar ayol Hajjatul Islomni (ya’ni zimmasida farz boʻlgan hajini) ado etmagan bo‘lsa, homiladorlik hajni tark etish uchun uzr emas. Chunki ayol tiqilinch va odamlar turtadigan joylardan o‘zini chetga olishi mumkin. Agar o‘zi tosh ota olmasa, o‘rniga boshqasini vakil qiladi. Agar piyoda tavof va sa’y qila olmasa, aravachada tavof va sa’y qiladi… va hokazo.

Bugungi kunda koʻpchilik yo‘l, turar joy va ibodatlarni ado etish jihatidan juda qulay sharoitlarda haj qiladi.

3. Ha, agar bir homilador ayolga ishonchli shifokor hajga chiqishi o‘ziga yoki homilasiga xavf tug‘dirishini (kasallik, zaif yoki boshqa sabablarga ko‘ra) aytsa, u o‘sha yili haj qilishdan man qilinadi. Bu man qilishga quyidagi hadis dalil boʻladi:

Ibn Abbos roziyallohu anhudan rivoyat qilinadi: «Payg‘ambar sollallohu alayhi va sallam: «Zarar berish ham, zarar koʻrish ham yoʻq», dedilar» (Ibn Moja, 2341; Hadis hukmi: «sahih». Manba: «Silsilatu Sahih», 250).

4. Ba’zi shifokorlar homiladorlikning boshlang‘ich davrida ona va homilaga xavf tug‘ilishi mumkin bo‘lgan holat bilan homiladorlikning so‘nggi oylarida bo‘lib, xavf asossiz bo‘ladigan holatni bir-biridan farqlaydilar.

Alloh bilguvchiroqdir.