1. Vitr namozida qunut duosini yodlab olguningizcha varaqdan yoki kitobchadan oʻqishingizda zarar yoʻq. Soʻngra yodlab olgach, oʻqishni tark etib, yoddan duo qilasiz. Xuddi shuningdek, koʻp Qurʼon yod olmagan kishi uchun nafl namozida Musʼhafdan oʻqish joizdir.

Shayx Ibn Boz rahimahullohdan soʻraldi: «Taroveh namozida Musʼhafdan Qurʼon oʻqishning hukmi nima? Bunga Qurʼon va Sunnatdan qanday dalil bor?»

U kishi quyidagicha javob berdilar:

«Ramazonda tungi namozlarda Musʼhafga qarab qiroat qilishning zarari yoʻq, chunki bu amal moʻminlarga Qurʼonni toʻliq eshittirish imkonini beradi. Zero, Qurʼon va Sunnatdagi sharʼiy dalillar namozda Qurʼon oʻqishning mashruʼ ekaniga dalolat qiladi va bu Musʼhafga qarab boʻlsin, yoki yoddan oʻqilsin, ikkisini ham oʻz ichiga oladi. Oisha roziyallohu anhodan sobit boʻlganki, u kishi oʻz mavlolari Zakvonga Ramazon qiyomida imomlik qilishni buyurganlar va u Musʼhafdan oʻqir edi. Buni Buxoriy rahimahulloh oʻz «Sahih»larida taʼliqan, jazm siygʻasi bilan zikr qilganlar» («Fatovo al-Islomiyya», 2/155).

2. Qunut duosida Paygʻambar sollallohu alayhi va sallamdan vorid boʻlgan lafzlar bilan duo qilish shart emas. Balki namozxon undan boshqa duo qilishi yoki unga qoʻshimcha qilishi joiz. Hatto Qurʼoni Karimdan duoni oʻz ichiga olgan oyatlarni oʻqisa ham, maqsad hosil boʻladi. Navaviy rahimahulloh aytadi: «Bilingki, tanlangan mazhabga koʻra, qunutda muayyan bir duo shart emas. Qaysi duoni qilsa ham, qunut hosil boʻladi. Agar bir oyat yoki Qurʼoni Azizdan duoni oʻz ichiga olgan oyatlar bilan qunut qilsa ham, qunut hosil boʻladi. Lekin afzali sunnatda kelganidir…», («al-Azkar an-Navaviyya», 50-bet).
3. Savol beruvchi birodarimizning qunut duosi oʻrniga Qurʼon oʻqiganlarini zikr qilganiga kelsak, shubhasiz, buni qilish mumkin emas. Chunki qunutdan maqsad duodir. Shuning uchun, agar bu oyatlar duoni oʻz ichiga olgan boʻlsa, ularni oʻqish va ular bilan qunut qilish joiz boʻladi, masalan, Alloh taoloning ushbu soʻzi kabi:

«Parvardigoro, bizni hidoyat qilganingdan keyin — endi dillarimizni haq yoʻldan ogʻdirma va bizga Oʻz huzuringdan rahmat ato etgin! Albatta, Sengina barcha yaxshiliklarni ato etguvchisan!» (Oli Imron: 8).

4. Savol beruvchi birodarimizning qunutning farzligini zikr qilganiga kelsak, bu toʻgʻri emas, chunki qunut sunnatdir. Shunday ekan, agar namozxon uni tark etsa, namozi sahihdir.

Shayx Ibn Boz rahimahullohdan soʻraldi: «Ramazon kechalarida vitrda qunut duosini oʻqishning hukmi nima va uni tark etish joizmi?»

U kishi javob berdilar:

«Vitr namozida qunut duosini oʻqish sunnatdir. Bu amal gohida tark etilsa ham, zarari yoʻq».

U kishidan har kecha vitrda qunutni davom ettirish hukmi borasida «Bu salaflarimizdan rivoyat qilinganmi?», deb soʻraldi.

U kishi javob berdilar:

«Bunda haraj yoʻq, balki bu sunnatdir. Chunki Paygʻambar sollallohu alayhi va sallam Husayn ibn Ali roziyallohu anhumoga vitrda qunutni oʻrgatganlarida, uni baʼzida tark etishga ham, doim qilishga ham buyurmaganlar. Bu esa ikkisi ham joiz ekaniga dalolat qiladi. Shuning uchun Ubay ibn Kaʼb roziyallohu anhudan sobit boʻlganki, u kishi Rasululloh sollallohu alayhi va sallamning masjidlarida sahobalar roziyallohu anhumga namoz oʻqib berganlarida, baʼzi kechalar qunutni tark etardilar. Ehtimol, buni odamlarga uning vojib emasligini bildirish uchun qilgandirlar. Vallohu valiyyut-tavfiq» «Fatava Islamiyya» (2/159).

Alloh bilguvchiroqdir.