Kofirlar masjidga kirishi joizmi?

Javob

Alloh taologa hamdu sanolar, Rasululloh sollallohu alayhi vasallamga salavot va salomlar bo‘lsin.

Masjidul Harom va uning atrofidagi butun Haram hududiga har qanday kofirlarni kiritish musulmonlarga man etilgan. Bunga Allohning quyidagi oyati asos bo‘ladi:

«Ey mo‘minlar, hech shak-shubhasiz, mushriklar nopok kimsalardir, bas, (ular) bu yildan so‘ng Masjidul-Haromga yaqin kelmasinlar!» (Tavba: 28).

Boshqa masjidlarga keladigan bo‘lsak, ba’zi fuqaholar buning haromligini ko‘rsatuvchi dalillar bo‘lmagani sababli uni ruxsat etilgan deb hisoblashgan. Ayrim fuqaholar esa Masjidul Haromga qiyoslab, joiz emas deb aytishgan. To‘g‘ri fikr shuki, diniy manfaat yoki zarurat bo‘lsa, ruxsat etiladi. Masalan, ularni Islomga da’vat qiladigan so‘zlarni eshitish yoki masjiddan suv ichish kabi ehtiyojlari uchun va shunga o‘xshash holatlarda kirishlari mumkin.

Chunki Payg‘ambar sollallohu alayhi va sallam Sumoma ibn Usolni musulmon bo‘lishidan oldin masjidda bog‘lab qo‘ygan edilar. Shuningdek, Saqif qabilasining vakillari va Najronlik nasroniy elchilarni ham musulmon bo‘lishlaridan oldin masjidga joylashtirgan edilar. Bu amalning ko‘plab foydalari bor edi: ular Payg‘ambar alayhissalomning va’z-nasihatlarini tinglashar, namoz o‘qiyotgan va Qur’on tilovat qilayotgan kishilarni kuzatishar edi. Bundan tashqari, masjidda doimiy qolib ketadiganlar uchun boshqa ulkan foydalar ham mavjud edi» (Doimiy qo‘mita fatvolaridan 6/276).

Agar ba’zi kofirlar masjidga kirib, musulmonlar namozni qanday o‘qishini ko‘rishni so‘rasalar, ular masjidni bulg‘aydigan biror narsa olib kelmasalar, ular orasida ochiq-sochiq kiyingan ayollar bo‘lmasa va shunga o‘xshash to‘siqlar bo‘lmasa, ularni masjidga kiritib, musulmonlarning orqasida o‘tirib namozni kuzatishlariga ruxsat berishning zarari yo‘q.  Biz ularning holatini bilmay, ularga baqiradigan musulmonlarni ogohlantirishimiz kerak.

Alloh bilguvchiroqdir.