Dajjol, Dobba va Yaʼjuj-Maʼjuj toʻgʻrisida

Javob

Alloh taologa hamdu sanolar, Rasululloh sollallohu alayhi vasallamga salavot va salomlar bo‘lsin.

Dajjol – Alloh yaratgan bir inson boʻlib, u Qiyomatga ozgina qolganda, qandaydir sababga koʻra qattiq darajada gʻazabnok boʻlganida xuruj qiladi va Yerda buzgʻunchilik bilan kezadi, xudolikni daʼvo qiladi va odamlarni oʻziga sigʻinishga chaqiradi. Alloh unga imtihon uchun berib qoʻygan yomgʻir yogʻdirish, Yerni oʻt-oʻlanlar bilan tiriltirish va Yer osti xazinalarini yuzaga chiqarish kabi gʻayri tabiiy (xoriqulodda) xususiyatlar bilan odamlarni fitnalaydi. U qizgʻish rang, kalta boʻyli, jingalak–soch, oʻng koʻzi nuri oʻchgan shapkoʻr, chap koʻzi esa boʻrtib chiqqan bir parcha et bilan qoplangan, ikki koʻzining oʻrtasiga «kofir» deb yozib qoʻyilgan boʻladi. unga ergashadiganlarning aksar qismi yahudiylar boʻladi. Dajjolning fitnasi Falastindagi «Lud» shahri ostonasida, shu voqyealar asnosida osmondan nozil boʻlgan Iso ibn Maryam alayhissalom uni nayza bilan oʻldirganidan soʻng barham topadi. 

Yaʼjuj va Maʼjuj ham – Odam bolasidan boʻlgan ikki kofir qabiladir. Yuzlari keng–yalpoq, koʻzlari kichik boʻladi. Ular bir paytlar buzgʻunchilik qilib haddan oshganida Alloh ularga qarshi Zul-qarnaynni chiqargan. Oʻshanda Zul-qarnayn ularni qolgan dunyodan toʻsib turuvchi ulkan toʻsiq-devor qurgan boʻlib, ular hali hanuz toʻxtamasdan uni teshib tashqari chiqishga urinib keladilar. Faqat oxir zamon boʻlganda, Iso alayhissalom Dajjolni oʻldirganidan soʻng, Alloh ularga devorni teshib chiqishga izn berganidagina devordan tashqari chiqishga muvaffaq boʻladilar. Keyin ular son–sanoqsiz toʻplar boʻlib chor taraf tarqaladilar va odamlar ustiga har tepalikdan oqib tusha boshlaydilar. «Tabariyya» koʻlini ichib quritadilar. Yerda buzgʻunchilik qiladilar. hech kim ularga qarshilik koʻrsatolmaydi. Hatto Iyso alayhissalom ham, atrofidagi moʻminlar bilan Allohdan ularni qutqarishlarini soʻrab «Tur» togʻiga chekinib chiqadilar. Oxiri Alloh boʻyinidan kirib tanasini ichidan yeya boshlaydigan qurt chiqarib Yaʼjuj va Maʼjujni halok qiladi, jasadlarini esa dengizga oborib tashlaydigan qushlarni yuboradi, ketidan yomgʻir yogʻdirib ular jasadidan qolgan sassiq-iflosliklarini tozalab tashlaydi. 

   Dobba: Misli koʻrilmagan bahaybat bir (urgʻochi) maxluq boʻlib, Alloh uni odamlar juda buzilib ketgan vaqtda yerdan (ehtimol Makka haramidan) chiqaradi. U aqll–ongli, gapiradigan maxluq boʻladi va odamlarga gapiradi, vaʼz qiladi. Yana u har bir inson burni ustiga moʻminlarni kofirlardan ajratadigan belgi–alomat qoʻyib chiqadi.

Qoʻshimcha maʼlumot uchun, Yusuf al–Vobilni «Qiyomat alomatlari» kitobiga yoki Umar al–Ashqarning «Katta qiyomat» kitobiga murojaat qilishingiz mumkin!

   Musulmon kishi Alloh va Rasulining har bir soʻziga, jumladan, koinotda Allohning kuch-qudratiga dalolat qiluvchi ajoyibu-gʻaroyib maxluqotlardan qanchadan qancha yaratgan va bundan keyin ham yaratajak ekaniga iymon keltirib ishonmogʻi lozim.