Tahorat duolari

Javob

Alloh taologa hamdu sanolar, Rasululloh sollallohu alayhi vasallamga salavot va salomlar bo‘lsin.

Payg‘ambarimiz sollallohu alayhi va sallamdan tahorat olish asnosida biror a’zoni yuvganda yoki mas’h tortganda aytiladigan duo sobit bo‘lmagan. Bu borada aytilgan duolar bid’at bo‘lib, ularning asosi yo‘qdir. Shariatda mashhur bo‘lgani – tahorat boshlanishida bismillah aytish, tahoratdan so‘ng ikki shahodatni aytish va ikki shahodatdan keyin: «Allohumma-j’alni minat-tavvabiyna vaj’alni minal-mutatohhiriyn» deb aytishdir.

Bunga dalil:

Umar ibn Xattob roziyallohu anhudan rivoyat qilinadi: «Rasululloh sollallohu alayhi vasallam aytdilar: «Sizlardan biror kishi maromiga yetkazib [mukammal] tahorat qilib, so‘ngra: «Ashhadu alla ilaha allallohu vahdahu la sharika lahu va ashhadu anna muhammadan abduhu va rosuluh. Allohummaj’alniy minat tavvabiyna, vaj’alniiy minal mutatohhiriyn» (ya’ni, «Men shohidmankim, Allohdan boshqa haq iloh yo‘q, u yakka-yu yagonadir, sherigi yo‘qdir va men shohidmankim, Muhammad uning bandasi va elchisidir. Allohim, meni (haqiqiy) tavba qilganlardan aylagin va poklanganlardan aylagin!), desa uning uchun jannatning sakkiz eshigi ochiladi. U o‘sha eshiklarning xohlaganidan kiradi». (Termiziy, 55; Hadis hukmi: «sahih». Manba: «Tamomul minna», 96).

Alloh bilguvchiroqdir.