Kunlik sunnat namozlari – Ravotib sunnatlar

Javob

Alloh taologa hamdu sanolar, Rasululloh sollallohu alayhi vasallamga salavot va salomlar bo‘lsin.

Doimiy sunnat namozlari Payg‘ambarimiz sollallohu alayhi va sallamning quyidagi hadislarida keltirilgan:

Oisha roziyallohu anhodan rivoyat qilinadi: «Rasululloh sollallohu alayhi va sallam aytdilar: «Kim o‘n ikki rakaat sunnat namozini muntazam o‘qisa, Alloh u uchun jannatda bir uy quradi: peshindan oldin to‘rt rakaat, undan keyin ikki rakaat, shomdan keyin ikki rakaat, xuftondan keyin ikki rakaat va bomdoddan oldin ikki rakaat» (Sunani Termiziy, 414; Hadis hukmi: «sahih». Manba: «Sahihul Jome’», 6183).

Anbasa ibn Abu Sufyon Ummu Habibadan rivoyat qilishicha, Rasululloh sollallohu alayhi va sallam shunday deganlar: «Kim bir kecha­kunduzda o‘n ikki rakaat namoz o‘qisa, jannatda unga bir uy quriladi: peshindan oldin to‘rt rakaat va undan keyin ikki rakaat, shomdan keyin ikki rakaat, xuftondan keyin ikki rakaat va bomdoddan oldin ikki rakaat». (Sunani Termiziy, 415; Hadis hukmi: «hasan-sahih». Manba: «Sahihul Jome’», 6362).

Asr namozining alohida sunnati yo‘q, ammo uning farzidan oldin to‘rt rakaat namoz o‘qish mustahabdir, lekin bu savob va davomiylik jihatidan sunnati ravotib kabi emas. Bu to‘rt rakaat quyidagi hadisda eslatilgan:

Abdulloh ibn Umar roziyallohu anhudan riovoyat qilinadi: «Nabiy sollallohu alayhi va sallam: «Asrdan oldin to‘rt rakaat namoz o‘qigan odamni Alloh rahm qilsin», dedilar. (Sunani Termiziy, 430; Hadis hukmi: «gʻarib-hasan». Manba: «Sahihul Jome’», 3493).

Yuqoridagi barcha to‘rt rakaatli nafl namozlar imom Shofe’iy va imom Ahmad nazdida ikki rakaatdan boʻlib-boʻlib o‘qiladi.

Alloh bilguvchiroqdir.