Bokiralik pardasini tiklash hukmi

Javob

Alloh taologa hamdu sanolar, Rasululloh sollallohu alayhi vasallamga salavot va salomlar bo‘lsin.

Bu masala zamonaviy masalalardan biri bo‘lgani bois, olimlarning bu boradagi ilmiy qarashlarini o‘rganib chiqib, toʻgʻriroq yechimni topishimiz lozim.

Birinchi fikr:

Bokiralik pardasini tiklash mutlaqo joiz emas.

Ikkinchi fikr: holatga koʻra hukm oʻzgaradi:

1. Agar bokiralik pardasining yirtilishi baxtsiz hodisa yoki shariatta gunoh hisoblanmaydigan harakat tufayli yuz bergan bo‘lsa va nikoh aqdi doirasidagi jinsiy aloqa natijasida bo‘lmasa, qaraladi: Agar jamiyatning urf-odatlari va an’analari tufayli qiz qiyinchilik va nohaq ayblovlarga duchor bo‘lishi ehtimoli yuqori deb baholansa, bu operatsiyani o‘tkazish vojib hisoblanadi. Agar bunday bo‘lmasa, operatsiya qilish afzalroq.
2. Agar yirtilish nikoh aqdi doirasidagi jinsiy aloqa natijasida (masalan, ajrashgan ayolda) yoki odamlar orasida xabari tarqalib ketgan zino (nikohsiz jinsiy aloqa) tufayli yuz bergan bo‘lsa, bu operatsiyani o‘tkazish haromdir.
3. Agar pardaning yirtilish sababi barchaga sir boʻlgan zino tufayli yuz bersa, shifokor uni tiklash yoki tiklamaslikni tanlash huquqiga ega, ammo tiklash afzalroq.

Ulamolar ixtilof qilgan nuqtalar:

Bu ikki qarash o‘rtasidagi farqlar yuqorida keltirilgan birinchi va uchinchi holatlarga taalluqli. Ikkinchi holatga kelsak, ular bunday vaziyatlarda operatsiya o‘tkazish harom ekanligiga ittifoq qilishgan.

Dalillar:

1. Birinchi qarashning dalillari (butunlay harom ekani)

Birinchidan: Bokiralik pardasini tiklash nasllarning aralashib ketishiga olib kelishi mumkin. Chunki ayol avvalgi jinsiy aloqadan homilador bo‘lishi, so‘ngra bokiralik pardasi tiklangach turmushga chiqishi, va homiladorlik eriga nisbat berilishi oqibatida halol bilan harom aralashib ketishi mumkin.

Ikkinchidan: Bokiralik pardasini tiklash ayolning eng ogʻir avrat qismiga qarashni talab qiladi.

Uchinchidan: Bokiralik pardasini tiklash imkoniyati yosh ayollarni zino qilishga undashi mumkin, chunki ular keyinchalik uni tiklatishlari mumkinligini bilishadi.

To‘rtinchidan: Yaxshi va yomon oqibatlar masalasi mavjud. Agar yomon oqibatlarni bartaraf etib, yaxshi oqibatlarga erishish mumkin bo‘lsa, shunday qilish kerak. Agar yomon oqibatlar yaxshi oqibatlardan ustun kelsa, Islom faqihlari aytganidek, yomon oqibatlarni bartaraf etib, yaxshi oqibatlar haqida qayg‘urmaslik kerak.

Agar bu tamoyilni qo‘llab, bokiralik pardasini tiklashdan kelib chiqadigan yomon oqibatlarni ko‘rib chiqsak, undan kelib chiqadigan yomon oqibatlar juda katta bo‘lgani uchun bu operatsiyani o‘tkazish joiz emasligiga hukm qilamiz.

Beshinchidan: Islom shariati qoidalaridan biri shuki, zararni boshqa zarar bilan bartaraf etib bo‘lmaydi. Bu qoidadan kelib chiqadigan xulosalardan biri: «Kishi o‘z yerini suv bosishidan saqlash uchun suvni boshqaning yeriga yo‘naltirishi mumkin emas». Xuddi shuningdek, qiz va uning onasi ham bokiralik pardasini tiklatib, erga zarar yetkazish orqali o‘zlaridan zararni daf qilishlari joiz emas.

Oltinchidan: Bokiralik pardasini tiklashning asosiy g‘oyasi shariatta joiz emas, chunki bu aldovning bir turi bo‘lib, Islomda aldash taqiqlangan.

Yettinchidan: Bokiralik pardasini tiklash qizlar va ularning oilalariga bokiralik pardasi yirtilishining haqiqiy sababi haqida yolg‘on gapirishga yo‘l ochadi, yolg‘on gapirish ham Islomda taqiqlangan.

Sakkizinchidan: Bokiralik pardasini tiklash shifokorlarga gunohni yashirish maqsadida abort qilish, homilani nobud qilishga yo‘l ochadi.

2. Ikkinchi qarashning dalillari (holatga koʻra hukm beriladi)

Birinchidan: Shar’iy manbalar shariat matnlari gunohlarni yashirish joiz va bunga targ‘ib qilinganini ko‘rsatadi. Bokiralik pardasini tiklash ushbu amaliyot joiz bo‘lgan hollarda bunga erishishga yordam beradi.

Ikkinchidan: Agar fohishalikdan pok ayolga jarrohlik amaliyotini o‘tkazishga ruxsat bersak, unga nisbatan yomon gumonlar eshigini yopamiz. Bu ayolga nisbatan zulmni bartaraf etadi va shariat buyurgan mo‘min-mo‘minalar haqida yaxshi gumonda bo‘lish maqsadiga erishiladi.

Uchinchidan: Bokiralik pardasini tiklash orqali ayolning oilasi zararni bartaraf etishi vojibdir. Agar ayol bu operatsiyani qildirmasa va eri buni bilb qolsa, o‘zi va oilasi uchun muammo tug‘iladi. Agar bu holat odamlar orasida tarqalsa, oila hech qachon qizlariga turmush o‘rtoq topa olmasligi mumkin. Shuning uchun ularga bu holatda begunoh bo‘lganlari sababli zararni daf qilishga ruxsat beriladi.

To‘rtinchidan: Musulmon shifokorning gunohni yashirish uchun bu operatsiyani o‘tkazishi jamiyatga, ayniqsa yosh ayollar ruhiyatiga ijobiy ta’sir ko‘rsatadigan umumiy tarbiyaviy ahamiyatga ega.

Beshinchidan: Bokiralik pardasini tiklash mumkin deb hisoblagan holatlarda aldov ehtimoli mavjud emas.

QAYSI FIKR TO‘G‘RIROQ?

Eng to‘g‘ri fikr – Alloh bilguvchiroq – bokiralik pardasini tiklash mutlaqo joiz emasligidir.

Bunga quyidagi sabablar bor:

Birinchidan: Bu fikrni qo‘llab-quvvatlovchi olimlar keltirlgan dalillar sahihdir.

Ikkinchidan: Ikkinchi fikr egalarining dalillariga quyidagicha javob beriladi:

Birinchi dalilga javob: Islomda zarur bo‘lgan satr qilish shar’iy dalillarda gunohni yashirish deb ta’riflangan, ammo bu maqsad bokiralik pardasini tiklash orqali amalga oshmaydi. Aslini olganda, bu haromdir, chunki u avratni ochishni o‘z ichiga oladi va yomonlik eshigini ochadi.

Ikkinchi dalilga javob: Erning ayol haqida yomon fikrda bo‘lishining oldini olish nikohdan oldin unga vaziyat haqida xabar berish orqali amalga oshirilishi mumkin. Agar u qabul qilsa, yaxshi, aks holda Alloh uning o‘rniga yaxshiroq birini beradi.

Uchinchi dalilga javob: Bu operatsiyani amalga oshirish bilan aytilgan yomon oqibatdan butunlay qochib bo‘lmaydi, chunki er bu haqda bilib qolishi mumkin, hatto boshqalarning unga xabar berishi orqali bo‘lsa ham. Ushbu yomon oqibat ayol eriga qizligining yo‘qolgani haqida xabar bermasdan turmushga chiqishi holatida yuzaga keladi. To‘g‘ri bo‘lgan narsa esa, eriga xabar berish va uni ogohlantirishdir. Agar u rozilik bersa, oqibati yomon bo‘lmaydi, shuningdek, garchi u nikohdan voz kechishga qaror qilsa ham.

To‘rtinchi dalilga javob: Bu yashirishning ba’zi ijobiy tomonlari bo‘lsa-da, ayollarning zino qilishini osonlashtirish kabi salbiy oqibatlari ham mavjud. Yomon oqibatlarni bartaraf etish foyda olishdan ustun turadi.

Beshinchi dalilga javob: Bunda hech qanday aldov yo‘qligini ayta olmaymiz, chunki bu bokiralik pardasi yangilangan, u asl bokiralik pardasi emas. Agar biz sakrash natijasida va shunga o‘xshash tabiiy ravishda bokiralik pardasi buzilgani sababli erning aldanmayotganini tasdiqlasak ham, ayolga tajovuz qilinishi natijasida bokiralik pardasi buzilgan holatlarda aldov yo‘qligini ayta olmaymiz.

Ikkinchidan: Birinchi fikrni yoqlovchilar aytib o‘tganidek, saddi zariy’a – zararning oldini olish, ayniqsa, farjlar va bachadonlarning hurmatini poymol qilishga olib boradigan ishlarda juda muhim sanaladi. Shubhasiz, bokiralik pardasini tikishning joizligi haqidagi qarash buzuqlikni keltirib chiqaradi.

Uchinchidan: Islomdagi asosiy tamoyil shuki, avratni ochish, uni ushlash va unga qarashning haromdir. Ikkinchi fikrni qo‘llab-quvvatlovchilar keltirgan uzrlar bokiralik pardasini tiklash operatsiyalarini bu umumiy qoidadan istisno qilish uchun yetarli emas. Demak, biz ushbu hukmga amal qilishimiz va bokiralik pardasini tiklash uchun operatsiya qilish harom ekanligini aytishimiz kerak.

Beshinchidan: Bo‘hton qilishning yomon oqibati voqeadan keyin ayolning aybsizligini isbotlash uchun tibbiy ma’lumotnoma olish orqali bartaraf etilishi mumkin. Bu eng yaxshi usul va bu bilan bokiralik pardasini tiklash uchun operatsiya qilishga hojat qolmaydi.

Mana shu barcha sabablar bois, shifokor uchun ham, ayol uchun ham bu tur jarrohlikni amalga oshirish joiz emas.

Alloh bilguvchiroqdir.

Doktor Muhammad ibn Muhammad Muxtor ash-Shinqitiyning «Tibbiy jarrohlik ahkomlari va ulardan kelib chiqadigan natijalar» kitobining 403-betiga qarang.

Tavba qilmagan ayollarga kelsak, ular uchun qizlik pardasini tiklash amaliyoti joiz emas, chunki bu unga o‘sha gunohni davom ettirishga yordam beradi. Xuddi shunday, ilgari jinsiy aloqada bo‘lgan ayolga bu operatsiyani o‘tkazishga ruxsat berilmaydi, chunki bu aldov va firibgarlikka yordam berishdir. Negaki bu operatsiyadan keyin u bilan birga bo‘lgan kishi uni bokira deb o‘ylaydi, holbuki u bokira emas.

Alloh bilguvchiroqdir.