Xatmi Qur’onni nishonlash hukmi

Javob

Alloh taologa hamdu sanolar, Rasululloh sollallohu alayhi vasallamga salavot va salomlar bo‘lsin.

Bu yoshdagi (yaʻni, o‘n bir yoshli) muslima qizning dindan uzoqlashgan yurtda va nosogʻlom jamiyat orasida Alloh taoloning Kitobini to‘liq xatm qilishi katta yutuqdir. Qizning savolda o‘z ismini yashirgani esa, uning ixlosiga dalolat qiladi, inshaalloh. Ammo savolga kelsak, men bu ishni ommaga oshkor qilmaslik kerak deb hisoblayman, faqatgina boshqalarni shunga undash maqsadida ma’lum qilinishi bundan mustasno. U holda bu kichik tadbir shaklida oʻtkazilishi, unda ba’zi qarindosh ayollar yoki dugonalaringizni chaqirishingiz, riyo va shuhratparastlikdan saqlangan holda Qur’onni xatm qilish tajribangizni ular bilan oʻrtoqlashib, boshqalarni ham bu ishga targʻib qilishingiz mumkin. Shuningdek qizlarning onalari Qur’oni Karimning naqadar ulug‘ligi, Qur’on tilovatining fazilati hamda musulmonning Qur’onga bo‘lgan ehtiromi haqida aytib berishlari maqsadga muvofiqdir. Shuningdek, u qizlar ham ne’matga shukr qilish va shodlik ulashish maqsadida oʻz dugonalarini bu ziyofatga chaqirsalar, buning ham zarari yo‘q, faqat bu tadbir bayramga aylanib ketishiga yo‘l qo‘ymaslik lozim.

Yuqoridagilardan ko‘rinib turibdiki, Qur’onni yod olish yoki xatm qilishni nishonlash, odamlarni taklif etish va bu munosabat bilan taom ulashish ikki xavfni keltirib chiqarishi mumkin: birinchisi, riyokorlik, shuhratparastlik, manmanlik va o‘zini katta olish; ikkinchisi esa, buni diniy bayramga aylantirib, bid’atga yo‘l qo‘yish. Birinchi xavfdan saqlanish uchun kishi Allohga chin dildan ixlosli bo‘lishga intilishi lozim. Ikkinchi xavfdan qochish uchun esa, bu tadbirni faqat oila a’zolari va kam sonli qarindoshlar davrasida o‘tkazish kerak. Bundan tashqari, bu amal sunnat degan e’tiqod paydo boʻlmasligi uchun ba’zan uni tark etish lozim.

Allohdan sizga ne’matlarini ziyoda qilishini, Qur’onni yodlashga kuch-quvvat berishini hamda so‘zda va amalda ixlos nasib etishini so‘rayman.

Alloh bilguvchiroqdir