Fatvo mavzusi: Imomlik

Imomning yashirin gunohlari bor; u imomlikni davom ettirishi kerakmi?

Javob

Alloh taologa hamdu sanolar, Rasululloh sollallohu alayhi vasallamga salavot va salomlar bo‘lsin.

Siz ta’riflagan bu yosh yigit, o‘z qavmi orasida suyukli, lekin o‘zi bilan Parvardigori o‘rtasida gunoh qilayotgan kishidir. Mening fikrimcha, Alloh taolo uni imomlik maqomiga va jamoasining muhabbatiga sazovor qilgani, uning gunohdan voz kechib, o‘ziga zulm qilishni to‘xtatishini va Allohga to‘g‘ri ibodat qilib, shukr etishini taqozo qiladi. Chunki insonning o‘z qavmi tomonidan sevilishi va ularga imom bo‘lishi Alloh taoloning ulug‘ ne’matidir.
Alloh taolo marhamat qiladi:

«Rahmonning (suyukli) bandalari Yerda tavozu’ bilan yuradigan» (Furqon: 63).
Soʻng boshqa oyatda:

Ular: «Va bizlarni taqvodorlarga peshvo qilgin» (Furqon: 74), — deydi.

Namozxonlar taqvodorlardan bo‘lib, ularga imomlik qiluvchi ham ushbu oyatdagi «Va bizlarni taqvodorlarga peshvo qilgin» degan kishilar sirasiga kiradi. Shunday ekan, u bu ne’mat uchun Allohga hamd aytsin, o‘ziga zulm qilishni to‘xtatsin hamda buni Allohning toatiga qaytish vositasi qilib olsin va o‘z mavqeyi borasida Allohdan qo‘rqsin.

Uning «riyodan qo‘rqaman» degan so‘ziga kelsak, bu shayton har safar inson Allohga ibodat qilmoqchi bo‘lganida uning xayoliga soladigan vasvasadir. Shayton unga kelib: «Sen riyokorsan», deydi. U bu vasvasani o‘zidan daf qilishi, unga e’tibor bermasligi va Alloh azza va jalladan doimo:

«Sengagina ibodat qilamiz va Sendangina madad so’raymiz» (Fotiha: 5), deb yordam soʻrashi lozim.

Vallohu aʻlam.