O'qildi: 178
21.10.2025
/ 29 Rabiul-oxir 1447
Fatvo mavzusi: Ikki jins orasidagi munosabatlar
Savol
Ayollarga qarashning mutlaqo taqiqlangani menga ma’lum. Ulardan biri ba’zan e’tiborimni tortsa, bir-ikki soniya qarayman, keyin Allohning amrini eslab, darhol nigohimni chetga buraman. Shu qisqa muddatli qarashim uchun gunohkor bo‘lamanmi? «Islomda halol va harom» kitobida Qur’on ko‘zlarni tiyishga buyurishi va qarashning ta’rifi «ko‘zlar ayolning go‘zalligidan lazzatlanishi yoki shahvat bilan tikilib qolish» ekanini o‘qidim. Allohga shukrki, men hech qachon bu darajaga yetmaganman, lekin mana shu ikki soniya meni xavotirga soladi. Alloh sizga baraka bersin.
O’xshash fatvolarJavob
Alloh taologa hamdu sanolar, Rasululloh sollallohu alayhi vasallamga salavot va salomlar bo‘lsin.
Jarir ibn Abdulloh roziyallohu anhu aytadi: «Rasululloh sollallohu alayhi vasallamdan beixtiyor ko‘z tushib qolishi haqida so‘ragan edim, nigohimni (boshqa tomonga) burishga buyurdilar», dedi» (Sahihi Muslim, 2159).
Muborakfuriy ushbu hadisning sharhida shunday deydi: «Hadisdagi «fujoa» deyilgan holat begona ayolga bexosdan, to‘satdan, ixtiyorsiz nazar tashlashni anglatadi. Arablar hech qanday sababsiz va kutilmaganda biror narsa sodir bo‘lishini «Faja’ahul amr» deyishadi. Roviyning «Nigohimni (boshqa tomonga) burishga buyurdilar» degan so‘zlariga kelsak, bu unga qayta, ya’ni ikkinchi marta qaramaslik buyurilganini bildiradi. Chunki birinchi qarash ixtiyorsiz bo‘lsa, kechiriladi. Agar takror yoki uzluksiz qarayversa, gunohkor bo‘ladi. Bunga Alloh taoloning quyidagi oyati dalil bo‘ladi:
«(Ey Muhammad alayhis-salotu vas-salom), mo‘minlarga ayting, ko‘zlarini (nomahramlarga tikishdan) to‘ssinlar» (Nur: 30).
Ibn Burayda otasi roziyallohu anhudan rivoyat qiladi: «Rasululloh sollallohu alayhi vasallam Aliyga: «Ey Aliy! Nazarga nazarni ergashtirma. (Beixtiyor bo‘lgan) birinchisi sen uchun (bezarar) bo‘lsa, boshqasi unday emas», dedilar» (Termiziy, 2777; Hadis hukmi: «hasan». Manba: «Sahihi Jome’», 7953).
Sunani Termiziyning sharhi boʻlmish «Tuhfat al-Ahvaziy» kitobida Muborakfuriy shunday deydi: «Rasululloh sollallohu alayhi vasallamning: «Nazarga nazarni ergashtirma» degan soʻzlari birinchi qarashdan so‘ng qayta qaramang deganidir. Birinchi qarash beixtiyor bo‘lsa, kechirilasiz, ammo ikkinchi qarash ixtiyoriy bo‘lgani uchun, u sizga qarshi hisoblanadi».
Bundan ma’lum boʻladiki, nomahram ayolga ataylab qarash va birinchi tasodifiy nigohdan so‘ng qarashni davom ettirish harom, joiz emasdir. Ayolning qaysi a’zosiga bo‘lmasin, uni chiroyli deb hisoblasangiz ham, hisoblamasangiz ham, shahvoniy tuyg‘ularni uyg‘otsa ham, uyg‘otmasa ham, yomon o‘y-xayollar bilan bog‘liq bo‘lsa ham, bo‘lmasa ham, axloqsiz ishlarga olib kelsa ham, kelmasa ham, qarash haromdir.
Allohdan sizni va bizni barcha harom ishlardan asrashini so‘raymiz. Shubhasiz, Alloh to‘g‘ri yo‘lga hidoyat qilguvchi Zotdir.
Bu javob foydali bo’ldimi?