Ayol kishining mahramsiz safar qilishi haromligi va mahramlik shartlari

Javob

Alloh taologa hamdu sanolar, Rasululloh sollallohu alayhi vasallamga salavot va salomlar bo‘lsin.

Islom dini ayolni muhofaza qilish maqsadida unga mahram bilan safar qilishni vojib qilgan, toki u shahvatparast va tuban niyatli kishilardan himoyada boʻlishi, shuningdek, mashaqqatli safarda zaifligi sababli mahrami unga yordam berishi uchun. Shuning uchun ayolning mahramsiz safar qilishi joiz emas. Chunki Sahihi Buxoriyda kelgan hadisda:

Ibn Abbos roziyallohu anhumodan rivoyat qilinadi: «U kishi Nabiy sollallohu alayhi vasallamning «Er kishi ayol kishi bilan zinhor xoli qolmasin! Mahrami birga bo‘lmasa, ayol kishi zinhor safar qilmasin!» deyayotganlarini eshitibdi. Shunda bir kishi turib: «Ey Allohning Rasuli, men falon-falon g‘azotga yozilgan edim, ayolim esa haj qilib yo‘lga chiqqan», debdi. U zot: «Bor, ayoling bilan haj qil», debdilar» (Sahihi Buxoriy, 3006).

Mahramning vojibligiga dalil shuki, Paygʻambar sollallohu alayhi va sallam bu kishiga, garchi u gʻazotlardan biriga yozilgan boʻlsa ham, jihodni tark etishni buyurdilar. Ayolning safari sayohat yoki shubhali safar uchun emas, aksincha, toat-ibodat boʻlgan haj uchun edi. Shunga qaramay Paygʻambar sollallohu alayhi va sallam unga xotini bilan haj qilish uchun qaytishni buyurdilar.

Ulamolar mahramda beshta xislatni shart qilishgan:

• Erkak boʻlishi;
• Musulmon boʻlishi;
• Balogʻatga yetgan boʻlishi;
• Aqli-raso boʻlishi;
• Ayolga nikohlanishi abadiy harom boʻlishi. Masalan ota, aka, amaki, togʻa, erning otasi, onaning eri, emikdosh aka-uka va shunga oʻxshashlar. Ammo vaqtinchalik harom boʻlgan kishilar bundan mustasno, masalan opa-singlisining eri, ammasining eri, xolasining eri).

Shunga koʻra, erining akasi, amakisining oʻgʻli yoki togʻasining oʻgʻli mahramlar qatoriga kirmaydi, shuning uchun ayolning ular bilan safar qilishi joiz emas.

Alloh bilguvchiroqdir.