Mavzular

Yangi fatvolar

Maqolalar

Kitoblar

Saqlanganlar

Murakkab qidiruv

Loyiha haqida

Fikr bildiring

Bosh sahifa » Ilm va daʼvat » Daʼvat » Gʻayridinlarni Islomga chaqirish » Islomda ayol kishi bilan muomala qilish
0 – 0
Fatvo: 2584

O'qildi: 111

20.01.2026

/ 1 Shaban 1447

Fatvo mavzusi: »

Islomda ayol kishi bilan muomala qilish

Savol

Men musulmon bo‘lmoqchiman. Biroq avvalgi hayotim borasida xavotirlarim bor. O‘tmishdagi tajribalarim Allohning to‘g‘ri yo‘liga ergashishimga to‘sqinlik qilishidan qo‘rqaman. Ochiqchasiga gapirganim uchun meni ma’zur tutasiz.

Islomda erkak va ayolning nikohsiz munosabatda bo‘lishi halol emas. Shu sababli Islomni qabul qilishdan oldin ichimda kurash avj olayotganini his qilyapman.
Ammo men Islomni qabul qilishdan oldin bu narsalarga boshqacha qarardim. Endi esa o‘tmishimdagi ishlarimni Islom harom qilgani haqida ko‘p o‘qidim.

Savolim, ayollar bilan munosabatda, istaklarim va shariat taqiqlagan narsalar o‘rtasida qanday muvozanat oʻrnatishim mumkin? Qanday yo‘l tutishim kerak-ki, bu istaklar meni yana gunohga boshlamasin va Islomdan uzoqlashtirmasin?

O’xshash fatvolar

Javob

Alloh taologa hamdu sanolar, Rasululloh sollallohu alayhi vasallamga salavot va salomlar bo‘lsin.

Javobning qisqacha mazmuni

Agar Islomni qabul qilsangiz va dinda sobit tursangiz, shariatga to‘g‘ri amal qilsangiz, Allohning amriga bo‘ysunib, qaytarganlaridan saqlansangiz, inshaalloh, savolingizda zikr qilgan ushbu qiyinchilikki yoʻliqmaysiz va bundan aziyat chekmaysiz. Keyin sizda shariat buyurgan nikoh kabi o‘zingizni haromdan tiyish vositalari bor. Pok yo‘ldan yurgan kishining botqoqlikka botish ehtiyoji bo‘lmaydi.

Batafsil javob:

Aziz savol beruvchi, sizga bo‘lgan xursandligimiz va minnatdorligimizni yashira olmaymiz. Savolingizda haq din – Islomni qabul qilishga moyillik alomatlari ko‘ringanidan chin dildan quvonch his etmoqdamiz. Siz zikr qilgan hayratlanish va ikkilanish tabiiy, chunki inson harom munosabatlar botqog‘iga botganda, keyin esa poklik va iffat diniga o‘tmoqchi bo‘lganda, ular o‘z nafslarining ustun kelishidan va Islom talab qiladigan poklik hamda iffatni saqlay olmasliklaridan qo‘rqadilar. Biroq, sizga shunday bir narsani aytib beramanki, u siz qo‘rqayotgan qiyinchiliklarni yengishingizga yordam beradi va vaziyatga to‘g‘ri nuqtai nazar bilan qarashingizni ta’minlaydi.

Haq dinga e’tiqod qiluvchi inson uchun bu e’tiqod uning xulq-atvori va axloqiga katta ta’sir ko‘rsatishi, shaxsiyatini o‘zgartirishi, uni butunlay qayta tiriltirishi va hayotini johiliyat davridan butunlay boshqa tomonga yo‘naltirishi lozim. Bu tub o‘zgarish va to‘liq farqlanish avval mavjud bo‘lmagan axloq va qadriyatlarni vujudga keltiradi hamda qalbni poklab, nafsda iffat paydo qiladi. Bular yangi musulmonni o‘tmishda qilgan ishlariga jirkanch ko‘z bilan qarashga undaydi. Shuningdek, johiliyat ahlining fahsh ishlari, xiyonatlari, buzuqlik, hayosizlik va boshqa nopokliklar bilan ajralib turadigan johiliyat ahlining holatiga nisbatan nafrat hissini uyg‘otadi. U kufr va fujur davrida shayton undan tortib olgan fitrat salomatligini va qalb pokligini qayta tiklaydi. Bu yo‘l ushbu shariatni joriy qilgan va ushbu dinni – Islomni nozil qilgan Parvardigorning buyruq va taqiqlariga to‘liq bo‘ysunishga asoslangan ixtiyoriy, rozilik bilan qilingan tanlovdan kelib chiqadi. Bu gapga ikkita isbotimiz bor: shar’iy va tarixiy.

Shar’iy dalilga kelsak, u Allohning Kitobining bir qancha oyatlarida zikr qilingan, masalan, Alloh taoloning ushbu so‘zlari:

﴿أَوَمَنْ كَانَ مَيْتًا فَأَحْيَيْنَاهُ وَجَعَلْنَا لَهُ نُورًا يَمْشِي بِهِ فِي النَّاسِ كَمَنْ مَثَلُهُ فِي الظُّلُمَاتِ لَيْسَ بِخَارِجٍ مِنْهَا﴾

«Avval o‘lik (kofir) bo‘lgan, so‘ngra biz uni (dinga hidoyat qilish bilan) tiriltirib, unga odamlar orasida o‘zi bilan birga olib yuradigan nurni (iymonni) berib qo‘yganimiz bir kishi zulmatlarda qolib ketgan va undan hech chiquvchi bo‘lmagan kimsaga o‘xshaydimi?!» (An’om: 122).

Yana Alloh taoloning ushbu oyati:

﴿وَالَّذِينَ لَا يَدْعُونَ مَعَ اللَّهِ إِلَٰهًا آخَرَ وَلَا يَقْتُلُونَ النَّفْسَ الَّتِي حَرَّمَ اللَّهُ إِلَّا بِالْحَقِّ وَلَا يَزْنُونَ ۚ وَمَنْ يَفْعَلْ ذَٰلِكَ يَلْقَ أَثَامًا۝٦٨يُضَاعَفْ لَهُ الْعَذَابُ يَوْمَ الْقِيَامَةِ وَيَخْلُدْ فِيهِ مُهَانًا۝٦٩إِلَّا مَنْ تَابَ وَآمَنَ وَعَمِلَ عَمَلًا صَالِحًا فَأُولَٰئِكَ يُبَدِّلُ اللَّهُ سَيِّئَاتِهِمْ حَسَنَاتٍ ۗ وَكَانَ اللَّهُ غَفُورًا رَحِيمًا۝٧٠﴾

«Ular Alloh bilan birga boshqa biron ilohga iltijo qilmaslar va Alloh (o‘ldirishni harom qilgan) biron jonni nohaq o‘ldirmaslar hamda zino qilmaslar. Kim mana shu (gunohlardan birontasini) qilsa uqubatga duchor bo‘lur. Qiyomat Kunida uning uchun azob bir necha barobar qilinur va u joyda xorlangan holida mangu qolur. Magar kim tavba qilsa va iymon keltirib yaxshi amallar qilsa, bas, Alloh ana o‘shalarning yomonlik-gunohlarini yaxshilik-savoblarga aylantirib qo‘yur. Alloh mag‘firatli, mehribon bo‘lgan Zotdir» (Furqon: 68-70).

Mufassirlar Alloh taoloning «Alloh ana o‘shalarning yomonlik-gunohlarini yaxshilik-savoblarga aylantirib qo‘yur» degan oyatini sharhlab: «Ular yomon amallarni yaxshi amallar bilan almashtirdilar», deganlar. Ali ibn Abu Talha Ibn Abbosdan rivoyat qilgan tafsirda: «Ular mo‘minlardir. Ular iymon keltirishlaridan oldin yomonlikda edilar. Alloh ularni yomonliklardan yuz o‘girtirib, yaxshilik tarafga burdi. Shunday qilib, ularning yomonliklarini yaxshiliklar bilan almashtirdi», deyilgan.

Ato ibn Abu Raboh aytadi: «Bu dunyoda kishi xunuk sifatlarda bo‘ladi, keyin Alloh buni yaxshilik bilan almashtiradi». Said ibn Jubayr aytadi: «Alloh ularning butlarga ibodatini Rahmonga ibodat bilan, musulmonlarga qarshi jang qilishni mushriklarga qarshi jang qilish bilan, mushrik ayollarga uylanishni mo‘mina ayollarga uylanish bilan almashtirdi». Hasan Basriy aytadi: «Alloh ularning yomon amallarini solih amallaga, shirklarini ixlosga, buzuqliklarini poklikka, kufrlarini Islomga almashtirdi». Bu Abul Oliya, Qatoda va boshqa jamoa olimlarning fikridir» (Ibn Kasir tafsiri).

Tarixiy dalilga kelsak, kufrda bo‘lib, keyin Islomga kirgan musulmonlarning qanday o‘zgarganlari va ishlari to‘g‘rilangani haqida ko‘plab qissalar bor. Quyidagi qissa shulardan biridir:

Amr ibn Shuayb otasidan, u esa bobosidan rivoyat qiladi: U aytdi: « Makkadan asirlarni olib, Madinaga olib keladigan kishi edi. Makkada Anoq ismli fohisha ayol bo‘lib, u Marsadning sevgilisi edi. U Makka asirlaridan birini olib ketishga va’da bergan edi. U aytadi: «Oydin kechada Makkadagi bir devor soyasiga yetib keldim. Anoq kelib, devor yonidagi soyamni ko‘rdi. U mening oldimga kelganda, meni tanib: «Marsad?» dedi. Men: «Ha, Marsad», dedim. U: «Xush kelibsiz! Bu kecha biznikida qoling», dedi. Men: «Ey Anoq, Alloh zinoni harom qilgan…» dedim U: «Ey chodir ahli, mana bu kishi asirlaringizni ko‘tarib qochmoqda», dedi (ya’ni, zinodan bosh tortgani uchun undan o‘ch olib, kofirlarni chaqirdi). Shunda sakkiz kishi meni ta’qib qildi va men Xandama yo‘li bilan ketdim. Bir kavak yoki g‘or oldiga yetib kelib, unga kirib oldim. Ular kelib, tepamda turishdi va peshob qilishdi. Garchi ularning peshobi boshimga tushsa-da, ammo Alloh meni ulardan toʻsib, ko‘zlarini koʻr qilib qo‘ydi». U soʻzida davom etib: «So‘ng ular qaytib ketishdi, men esa sherigimning oldiga qaytdim va uni toki Izxirga yetib kelguncha ko‘tarib oldim. U og‘ir kishi edi. Izxirga yetgach, uning kishanlarini yechdim. Men uni ko‘tarib borardim, u esa menga yordam berardi, nihoyat Madinaga yetib keldim. So‘ng Rasululloh sollallohu alayhi va sallamning oldilariga kelib: «Yo Rasulalloh, Anoqqa uylansam bo‘ladimi?» deb so‘radim. Rasululloh sollallohu alayhi va sallam sukut saqladilar va menga hech qanday javob bermadilar, soʻng quyidagi oyat nozil bo‘ldi.

﴿الزَّانِي لَا يَنْكِحُ إِلَّا زَانِيَةً أَوْ مُشْرِكَةً وَالزَّانِيَةُ لَا يَنْكِحُهَا إِلَّا زَانٍ أَوْ مُشْرِكٌ  وَحُرِّمَ ذَٰلِكَ عَلَى الْمُؤْمِنِينَ۝٣﴾

«Zinokor erkak faqat zinokor ayolga yoki mushrikaga uylanur. Zinokor ayolga faqat zinokor erkak yoki mushrik uylanur. Va bu (ya’ni, zinokor ayollarga uylanish) mo‘minlarga harom qilingandir» (Nur: 3). Bu qissa Alloh taoloning ushbu oyatining sababi nuzulidir. (Termiziy, 3177; Hadis hukmi: «hasan». Manba: «Sahihi Termiziy», 3177).

Qissadan hissa shuki, bu kishining holati Islomdan keyin qanchalik o‘zgargani va unga taklif etilgan harom ishga qoʻl urishdan tiyilganidir. Shuningdek, ayol kishi ham agar Islomni qabul qilsa va Islomga to‘g‘ri amal qilsa, uning holati shunday oʻzgaradi. Huddi quyidagi qissada kelgani kabi:

Abdulloh ibn Mug‘affaldan rivoyat qilinadi: johiliyat paytida bir fohisha ayol bor edi. Bir kishi uning yonidan o‘tayotganda yoki u o‘sha kishining yonidan o‘tayotganda, u kishi ayolga qo‘lini uzatdi. Ayol uni bu ishdan tiyish va inkor qilish uchun: «To‘xta! Alloh shirkni ketkazib, Islomni keltirdi», dedi. Shunda u kishi uni tashlab, ortiga qarab ketdi». («Mustadrak ala sahihayn», 1309; Imom Muslimning shartiga ko‘ra sahih).

Agar siz Islomni qabul qilsangiz va uni go‘zal tarzda amalda qo‘llasangiz, ushbu muborak shariatga to‘g‘ri rioya qilsangiz, Alloh subhanahu va taologa U zot sevgandek ibodat qilsangiz, Uning amrlariga bo‘ysunib, qaytarganlaridan tiyilsangiz, inshaalloh, savolingizda tilga olingan qiyinchiliklarga duch kelmaysiz va ulardan aziyat chekmaysiz. Keyin sizda shariat buyurgan nikoh kabi o‘zingizni haromdan tiyish vositalari bor. Kim pok yo‘ldan yursa, unga botqoqlikka botish ehtiyoji bo‘lmaydi. Allohdan sizni tez fursatda hidoyat qilishini va ishlaringizni oson aylab, yomonliklardan uzoqlashtirishini so‘raymiz. Payg‘ambarimiz Muhammad Mustafoga Allohning saloti va salomi bo‘lsin.

Foydali ma’lumotlar uchun quyidagi javoblarga murojaat qiling: 9465, 113996, 10680, 344118, 199119.

Alloh bilguvchiroqdir.

Fatvo manbasi

Maqola borasida fikringiz?

Izoh sababi
Ushbu qator to'ldirilishi shart.

Bu javob foydali bo’ldimi?

0

O’xshash fatvolar

  • Sevib qolgan yigit nima qilishi kerak?

    Men hozirda Britaniya universitetlaridan birida o‘qiyman va universitetda menga yoqib qolgan bir qiz bor.Men u bilan hech qachon gaplashmaganman. Odatda qizlar bilan gaplashmayman. Biroq, ba’zan salomlashib turamiz.Men Islom shariatiga amal qilgan holda ayollar bilan gaplashmaydigan bo‘lsam, unga qanday qilib turmush qurishni taklif qilishim mumkin? Buning eng yaxshi yo‘li qanday?Borib u bilan gaplashib, shar’iy chegaralardan chiqmagan holda avval tanishib ko‘raymi? Yoki unga to‘g‘ridan to‘g‘ri turmushga chiqishni taklif qilaymi?Agar unga avval tanishmasdan to‘g‘ridan to‘g‘ri turmushga chiqishni taklif qilsam, u meni yaxshi tanimagani uchun va u men mansub bo‘lgan madaniyatdan boshqa madaniyatga mansub bo‘lgani uchun taklifimni darhol rad etishidan qo‘rqaman. Boshqa tomondan, agar u bilan tanishish maqsadida gaplashsam, bu qilmishim Islomga zid bo‘lishidan qo‘rqaman.Men qiyin ahvoldaman, qanday yo‘l tutsam eng to‘g‘ri bo‘ladi?

  • Nasroniy bilan jiddiy suhbat

    Men sahifangizni ko‘zdan kechirayotib, undan zavq oldim, chunki men diniy maktabda ta’lim olayotgan nasroniy talabaman va ko‘proq bilim olishni xohlayman. Quyidagi fikrlar haqidagi qarashlaringizni bilmoqchiman, ular to‘g‘rimi?1. Islomda: Jannat may, ayollar va qo‘shiqlardan iborat. Jannatga erishish yo‘li ana shu narsalardan tiyilish, so‘ngra ular bilan mukofotlanish, shuningdek, Islomning besh rukniga amal qilishdir.2. Islomda: Najot va azobdan qutulishning kafolati yo‘q. Faqat umr bo‘yi shu yo‘lda yursangiz, Allohning najotiga va xalos bo‘lishga erishasiz, deyiladi. Hech qanday kafolat mavjud emas. Kafolatsiz yashash menga yoqmaydi. Men musulmonlar asliy gunohga ishonmasliklarini bilaman, lekin inson gunohkor boʻlib tugʻiladimi yoki yoʻqmi, bundan qatʼi nazar, inson xatokor va koʻp xato qiluvchi ekaniga qoʻshilmaysizmi? Inson o‘z xatolari va gunohlari bilan nima qiladi? Tavba haqida bilaman, ammo menga Alloh huzurida hech kim najot topolmaydigandek tuyuladi. Shu sababli, bizni o‘tmishdagi, hozirgi va kelajakdagi gunohlarimizdan xalos etish uchun O‘z O‘g‘lini bizning uchun qurbon qilib, xochga mixlanib oʻldirilishi uchun yubordi.3. Islomda najot kafolati yo‘q, bunday kafolatsiz yashash haqiqatan ham dahshatli narsa. Hayotingizni yashab, qiyomat kunida xalos boʻlishingiz uchun yetarlicha solih amallar qildingizmi yoki yoʻqmi, bilmaysiz, yetarlicha namoz oʻqidingizmi yoki yoʻqmi, bilmaysiz va hokazo… Bu haqiqatan ham dahshatli.Men koʻplab musulmon hamkasblarimdan o‘limdan so‘ng jannat yoki do‘zaxga borishlariga ishonchlari komilmi, deb so‘raganimda, ulardan ijobiy javob ololmadim. Islomda hech qanday kafolat yo‘q, chunki (bu din vakillari nasroniylardan farqli oʻlaroq, birgina) Iso Masihga ishonish orqali najot topishga ishonishmaydi; Islom insonning xatti-harakatlari va amallariga bog‘liq.Men musulmon bo‘lishni xohlasam ham buni qila olmayman. Agar musulmonlar o‘zlarini xalq orasidan tanlangan deb hisoblashsa, nega dinlarini yoymaydilar? Bu faqatgina musulmon bo‘lib tug‘ilganingiz uchun omadli bo‘lishga asoslanganmi?Agar kimdir nasroniy bo‘lishni istasa, u buni qila oladi. Har kim bir necha soniyada nasroniy bo‘lishi mumkin. Men tug‘ilganimda nasroniy bo‘lmaganman. Nasroniylar Iso Masih Allohga olib boradigan yagona yo‘l ekanligini ta’kidlaydilar.Iso Masihning o‘zi shunday degan: «Men Yoʻl, Haqiqat va Hayotman. Hech kim Otaga mening yoʻlimsiz yeta olmaydi». U «Men yo‘llardan biriman» demadi, balki «Men yo‘lman» dedi.U yana: «Men va Otam birmiz», deb aytgan.Men qanday qilib biror kishi bu haqiqatlardan koʻr boʻlishi mumkinligini tushunmayman, magar ular buni avval eshitmagan boʻlsalar.Men sizdan javob va izoh kutib qolaman.

  • Islomni qabul qilgani uchun kofira onasi undan voz kechdi

    Onam musulmon emas. U men bilan 13 yil oldin aloqani uzgan. Unga xat yozsam, javob bermaydi, qo‘ng‘iroq qilsam, telefonni oʻchirib qoʻyishi mumkin. Manzilini oʻzgartirgan, men uning yangi manzilini bilaman, lekin borsam, yana o‘zgartiradi. Agar biror kishi men haqimda yaxshi gapirsa, u uni men tomonga yon bosyabdi deb haqorat qiladi. Bilaman, u ruhiy kasal va ilgari kasalxonada yotgan. Uyda bo‘lganida yolg‘iz qolishni ma’qul ko‘radi. U Islomga qarshi ekanligini aytgan, shundan uning siqilishi sababi mening Islomni qabul qilganim ekanini bildim. Men nima qilishim kerak? Maslahat beringlar, Alloh sizlarni yaxshilik bilan mukofotlasin.

  • Xitoy millatdoshining Islom diniga ishtiyoqi va qalbidagi xavotirlari

    Islomni qabul qilishni orzu qilaman, lekin oziq-ovqat, ayniqsa cho‘chqa go‘shti masalasida ba’zi tashvishlarim bor. Men hali ham ota-onam bilan birga yashayman, biz asli xitoylikmiz va choʻchqa goʻshtidan tayyorlangan taom dasturxonimizdan aslo arimaydigan asosiy kundalik taomlardan hisoblanadi. Men Islomni qabul qilib, uyda ular bilan birga yashashda davom etsam, bilmagan holda yoki oldindan xabarim boʻlmay, choʻchqa goʻshtini tovuq goʻshti deb yeb qoʻyishdan xavotirdaman. Oilaviy yig‘inlar yoki tadbirlarda choʻchqa goʻshtidan tayyorlangan taomlardan o‘zimni tiyishga harakat qilaman, agar yeyishga majbur bo‘lsam, Allohga istigʻfor aytaman. Agar Islomni qabul qilsam va choʻchqa goʻshtini yeyishga majbur boʻlsam, Allohdan magʻfirat soʻrashim kerakmi? Men bu masaladan juda xavotirdaman va sizning maslahatingizga juda muhtojman.

  • Islomdan toʻsuvchi va loqaydlikka undovchilar

    Men so‘nggi bir necha oyni Islomni o‘rganish va tadqiq qilishga bag‘ishladim hamda yaqinda Qur’onni o‘qishni boshladim. Qalbimda shahodat kalimasini aytishga tayyorligimni his qilmoqdaman, ammo ba’zi musulmon do‘stlarim menga ishonishmayapti. Ular bu hayotni o‘zgartiruvchi qarorni shoshma-shosharlik bilan qabul qilmasligim haqida ogohlantirmoqdalar. Biroq, men chindan ham bu qadamni tashlashga tayyorman. Menga Islomga e’tiqod qilishim va Alloh barcha olamlarning Robbi, yagona Iloh ekanligiga guvohlik berishim uchun nima qilishim kerakligi haqida maslahat bera olasizmi? Shuni bilib qo‘yingki, men hayotimda hech qachon shoshilinch qaror qabul qilmaganman. Rahmat.

  • Vegeterian boʻlish joizmi?

    Men vegetarianman, ya’ni men go‘sht yoki hayvon mahsulotlarini yemayman. Islom dini menga yoqdi. Hayvon mahsulotlarini yemasdan turib, bu dinga kirish mumkinmi?