Homiladan foydalanib a’zolarni koʻchirib oʻtkazish joizmi?

Javob

Alloh taologa hamdu sanolar, Rasululloh sollallohu alayhi vasallamga salavot va salomlar bo‘lsin.

Bugungi kunda dunyoda «homila savdosi» deb ataluvchi tijorat mavjud bo‘lib, unda ba’zi shifokorlar homilani qasddan tushirishda ishtirok etadilar.

Bu amaliyotda homilaning a’zolari yoki hujayralaridan foydalaniladi va ulardan tayyorlangan inyeksiyalar boy-badavlat keksalar va boshqalarga foyda keltiradi deb ta’kidlanadi.

Bu katta jinoyatlardan bo‘lib, unda begunoh jonlarga zulm qilish va pul uchun qasddan o‘ldirish kabi harakatlar bor. Bu esa katta zulm hamda adolatsizlik hisoblanadi va uning hukmi kundek ravshandir.

Homilaning a’zolarni ko‘chirib o‘tkazish uchun ishlatilishi haqida Islom Fiqhi Akademiyasi quyidagicha fatvo chiqargan:

Birinchidan: Quyidagi holatlar va shartlardan tashqari, homilalardan boshqa shaxsga ko‘chirib o‘tkazish uchun a’zolar manbai sifatida foydalanish joiz emas:

1. Boshqa insonga a’zolarini ko‘chirib o‘tkazish maqsadida homilani abort qilish joiz emas. Aksincha, abort faqat tabiiy (qasdsiz) hollarda yoki shar’iy uzr mavjud bo‘lganda ruxsat etiladi. Homilani olib tashlash uchun jarrohlik operatsiyasiga faqat onaning hayotini qutqarish zarur bo‘lgandagina murojaat qilinadi.
2. Agar homila hayot kechira oladigan bo‘lsa, tibbiy muolajalar uning hayotini saqlab qolishga va uni himoya qilishga qaratilgan bo‘lishi kerak, undan a’zolarni ko‘chirib o‘tkazishda foydalanmaslik lozim. Agar homila yashashga qodir bo‘lmasa, undan faqat o‘limidan so‘ng shariat shartlariga muvofiq foydalanish mumkin.

Ikkinchidan: A’zolarni ko‘chirib o‘tkazish jarayonlari hech qanday tijorat maqsadlarini ko‘zlamasligi kerak.

Uchinchidan: A’zolarni ko‘chirib o‘tkazish jarayonlarini maxsus ishonchli tashkilot nazorat qilishi lozim.

Alloh bilguvchiroqdir.