Ayollarning niqob taqish shartlari

Javob

Alloh taologa hamdu sanolar, Rasululloh sollallohu alayhi vasallamga salavot va salomlar bo‘lsin.

Ayol kishining yuzini yopish majburiyati 2198-raqamli savolda muhokama qilingan, iltimos, o‘sha savolga murojaat qiling. Niqobga kelsak, u ko‘z atrofida maxsus teshiklari bo‘lgan yopinchiqdir. Bu Islomning dastlabki davrlarida musulmon ayollari orasida keng tarqalgan kiyim turi edi. U Payg‘ambarimiz sollallohu alayhi vasallamning ehromdagi ayollarga taqiqlangan narsalar haqidagi hadislarida tilga olingan.

Abdulloh ibn Umar roziyallohu anhumodan rivoyat qilinadi: «Bir kishi turib: «Ey Allohning Rasuli, ehrom uchun qanday kiyimlarni kiyishimizga buyurasiz?» dedi. Nabiy sollallohu alayhi vasallam: «Ko‘ylak, shalvarlar, sallalar va burnuslarni (qalpoqli bosh kiyim, kapyushon) kiymanglar. Faqat biror kishining shippagi yo‘q bo‘lsa, maxsi kiyib, to‘piqdan pastini kesib tashlasin. Za’faron va vars tekkan narsani kiymanglar. Ehromdagi ayol niqob tutmasin, qo‘lqop kiymasin», dedilar» (Sahihi Buxoriy, 1838).

Ba’zi ulamolar ayol kishilar yo‘lni ko‘rish uchun chap ko‘zini ochib olishlariga ruxsat berganlar. Agar ikkala ko‘zni ochish zarur bo‘lsa, teshikni faqat ko‘z o‘lchamiga moslab ochish lozim. Ehtiyot bo‘lish kerakki, niqobni ikkita keng teshik qilib olmaslik kerak, chunki bu ayolning ko‘zlarining go‘zalligini namoyon qilishi va uni ayolning ziynatini yopadigan hijob o‘rniga vasvasaga sabab bo‘ladigan vositaga aylantirib qo‘yishi mumkin.