Soch va soqolni qora rangga bo‘yash hukmi

Javob

Alloh taologa hamdu sanolar, Rasululloh sollallohu alayhi vasallamga salavot va salomlar bo‘lsin.

Erkak kishi soqolini qora rangga bo‘yashi joiz emas, chunki bu ishdan saqlanish haqida buyruq va buni qilishdan qaytariq kelgan.

Jobir roziyallohu anhudan rivoyat qilinadi: «Abu Quhofa fath fath kuni olib kelindi. Uning soch-soqoli xuddi sag‘omadek (ya’ni, guli va mevasi sochning oqiga o‘xshash o‘simlikdek) oppoq edi. Shunda Rasululloh sollallohu alayhi va sallam: «Buni biror narsa bilan o’zgartiringlar, ammo qoradan saqlaninglar», dedilar» (Muslim, 2102).

Ibn Abbos roziyallohu anhumo rivoyat qiladilar: Rasululloh sollallohu alayhi va sallam dedilar: «Oxir zamonda kaptarlarning jig‘ildonlari kabi (sochlarini) qora rangga bo‘yaydigan qavm paydo bo‘ladi. Ular jannat hidini ham hidlamaydilar» (Ahmad 2470; Hadis hukmi: «sahih». Manba: «Sahihul-jome’» 8153).

Ammo oqargan sochni qoradan boshqa rangga o‘zgartirish mustahabdir, yuqorida aytilgan Jobirning hadisiga ko‘ra. Sochlarni qizg‘ish yoki sarg‘ish tusga kiritadigan xina va shunga o‘xshash narsalar bilan bo‘yash joiz. Chunki Payg‘ambar sollallohu alayhi vasallam sochlarini sariq rangga bo‘yaganlari rivoyat qilingan. Imom Muslim rivoyat qilishicha, Abu Bakr Siddiq roziyallohu anhu xina va katamdan foydalanganlar, Umar ibn Xattob roziyallohu anhu esa xinadan foydalanganlar.

Abu Zarr roziyallohu anhudan rivoyat qilinadi: «Rasululloh sollallohu alayhi vasallam: «Bu sochning oqini o‘zgartiradigan eng yaxshi narsa – xina va katamdir», dedilar» (Nasoiy, 5078; Hadis hukmi: «sahih». Manba: «Sahihi Nasoiy», 5093).

Izoh: Katam – Yamanda o‘sadigan o‘simlik bo‘lib, bo‘yalganda qora rang beradi. Xina qo‘shib bo‘yaganda esa qizg‘ish-qoramtir rang hosil bo‘ladi.

Alloh bilguvchiroqdir.