O'qildi: 211
07.08.2025
/ 13 Safar 1447
Fatvo mavzusi: Bezaklar
Savol
Bir muddat oldin Islom haqida o‘rgandim, Allohga hamdlar bo‘lsin, U meni hidoyatga boshladi. Men ikki akam bilan birga soqol qo‘ydik. Bu ta’kidlangan sunnat oilamizning ba’zi a’zolariga ham yetib bordi, natijada bu yil oilamning boshqa a’zolari ham soqol qoʻyishdi. Uyda hayotimizni deyarli to‘liq islomiy qilishga erishdik. Xonadondagi barcha ayollar islomiy libosda yurib, imkon qadar Qur’on va sunnatga amal qilishadi. So‘ngra mamlakatda tartibsizliklar yuz berdi, odamlar soqollilarga qarshi chiqib, ularni ta’qib qila boshladilar va barcha soqolli erkaklar odamlarni o‘ldirishni va qon to‘kishni istaydi, deb o‘yladilar. Holbuki biz musulmonlar sifatida Rabbimiz o‘ldirishni harom qilgan jonni o‘ldirishni hech qanday holatda yoqlamaymiz. Keyin ota-onam va oila a’zolarim soqolimni olishga majburlay boshlashdi. Onam otamning mendan g‘azablanganini aytdi. Ammo men Payg‘ambarimiz sollallohu alayhi va sallamning so‘zlariga itoatsizlik qilishdan va gunohga botishdan qo‘rqaman.
O’xshash fatvolarJavob
Alloh taologa hamdu sanolar, Rasululloh sollallohu alayhi vasallamga salavot va salomlar bo‘lsin.
Birinchidan: Rasululloh sollallohu alayhi va sallamning yo‘l-yo‘riqlariga ergashganingiz va oila a’zolaringizni ham shunga da’vat etganingiz uchun Alloh sizni mukofotlasin.
Ikkinchidan: Oʻzingizga ma’lum, soqolni o‘stirish vojib, soqol olish esa haromdir. Yaratuvchiga – Xoliqqa itoat qilish maxluqqa, yaratilgan bandaga itoat qilishdan ustun turadi, garchi u banda eng yaqin qarindosh bo‘lsa ham. Bandaga itoat qilish faqat yaxshi ishlarda bo‘ladi. Ota-onangizning g‘azabi va soqol qo‘yganingizdan xafa bo‘lishi haqida aytganlaringiz boshqalarning boshiga tushgan voqealar tufayli sizlardagi his-tuyg‘u va xavotir natijasidir.
Ammo bu hodisalar asosan fitna va janjalga aralashish tufayli sodir bo‘lgan, soqol o‘stirganligi uchun emas. Shuning uchun bu zararlar besoqol odamlarga ham ta’sir qilganini ko‘rasiz. Siz haqda sobit turishingiz va Allohga itoat qilib, U Zotni rozi qilish uchun soqolingizni olmaslikda davom etishingiz kerak, garchi bandalar g‘azablansa ham. Fitna va qoʻzgʻalon manbalaridan uzoq turing, Allohga tavakkal qiling va Undan har qanday qiyinchilikdan chiqish yo‘lini so‘rang. Alloh taolo aytadi:
«Kim Allohdan qo‘rqsa, U Zot uning uchun (barcha g‘am-kulfatlardan) chiqar yo‘lni (paydo) qilur va uni o‘zi o‘ylamagan tomondan rizqlantirur. Kim Allohga tavakkul qilsa, bas, (Allohning) O‘zi unga yetarlidir. Albatta Alloh O‘zi (xohlagan) ishiga yetguvchidir. (Uning xohishiga qarshi turguvchi kimsa yo‘qdir). Darhaqiqat, Alloh barcha narsa uchun miqdor-o‘lchov qilib qo‘ygandir (ya’ni, hayotda ro‘y beradigan har bir yaxshi-yomon voqea-hodisa yolg‘iz Alloh xohlagan — belgilagan vaqt va o‘lchovda ro‘y beradi)» (Taloq: 2-3).
Boshqa oyatda shunday deydi:
«Kim Allohdan qo‘rqsa, (Alloh) uning ishini oson qilur. Bu Allohning sizlarga nozil qilgan hukmidir. Kim Allohdan qo‘rqsa, (Alloh) uning yomonlik-gunohlarini o‘chirur va uning ajr-mukofotini ulug‘ qilur» (Taloq: 4-5).
Sizga ota-onangizga mehribon bo‘lishingizni va ularning talablariga muloyimlik va odob bilan uzr aytishni maslahat beramiz.
Alloh bilguvchiroqdir.
Bu javob foydali bo’ldimi?